Markmið verkefnisins var að skoða hvernig mætti efla fjölbreyttari ferðamáta við Kirkjubraut og Kalmansbraut á Akranesi. Um leið átti að varpa fram hugmyndum um hvernig mætti styrkja almenningsrými svæðisins til að efla mannlíf og fegra umhverfið.

Útgangspunktur verkefnisins var götusnið í anda bæjargötu þar sem gert var ráð fyrir einfaldri, tvístefnuakrein fyrir miðju með samsíða bílastæðum, ásamt gróðurbeðum með blágrænum ofanvatnslausnum og hjóla- og göngustígum beggja megin götunnar.

Til að efla almenningsrými götunnar og á nálægum svæðum var skipulögð vinnustofa með íbúum bæjarins í maí 2025. Á vinnustofunni stóð Stúdíó Jæja fyrir fræðslu um arkitektúr, almenningsrými og sögu bæjarins eins og hún birtist í umhverfinu. Í kjölfarið gafst íbúum kostur á að myndgera hugmyndir sýnar á teikningar af nokkrum stöðum svæðisins.

Í kjölfarið vann Stúdíó Jæja úr hugmyndum íbúa og mótuðu þær inn í verkefnið. Þar var lögð fram n.k. verkfærakista til að efla samveru íbúa á öllum aldri. Jafnframt var lagt til að gefa steinsteyptum flötum götunnar sem mun þurfa að farga nýtt líf í umhverfismótun almenningsrýmisins. Slíkt styrkir sögulega vídd verkefnisins auk þess sem endurnotkun efna felur í sér lægra kolefnisspor.

Verkefnið er unnið fyrir Akraneskaupstað frá árinu 2024 og er enn í vinnslu en deiliskipulagsferli er að ljúka um þessar mundir. Umferðarráðgjöf er í höndum verkfræðistofunnar Eflu.